الجزار
وكبرت وانا بصراحة مش مقتنع بحاجات كتيرة كان ابويا بيعملها, بس مكنتش بقدر أعترض على أي حاجة لأن أبويا رغم حنيته على الفقراء وقلبه الكبير إلا انه كانت له هيبة ومش أي حد كان يقدر يعترض على كلامه من معلمين السوق فما بالك بيا انا ابنه, وأول ما دخلت في سن العشرينات أبويا بدأ يكلم ناس هنا وهناك عشان يشوفوا واحدة محترمة وكويسة أقدر اتجوزها, ولما كنت بستفهم بس منه هو عاوز يجوزني بدري ليه كان بيقولي جملة غريبة أوي
“الراجل اللي ميجوزش ابنه أو بنته وهو قادر على كدا بيتحاسب عليهم يوم القيامة”
وفعلا اتجوزت وربنا رزقني بأول فرحتي وكان اسمها وعد, البنت اللي كان روحها في جدها, وكانت أيام طويلة بتقعد معاه في المحل ومترضاش ترجع البيت أبدا, بل وأيام كنت أقعد بينها وبين جدها الاقيهم بيغمزوا لبعض وكأن بينهم أسرار هما بس اللي يعرفوها..
لدرجة إني كنت بغير على بنتي أوقات, خاصة انها حفظت كل تفصيلة بتحصل في المحل من يوم ما نفتح لحد آخر اليوم, كانت بتعبي أكياس الصدقة, وحافظة وشوش الناس اللي بياخدوها اسبوعيا, بل وكانت بتمسك السكينة عشان تتعلم التقطيع, كل ده وهي عندها ست سنين بس..
في الأيام دي بدأ أبويا يتعب وتظهر عليه أعراض الشيخوخة, وفضلت حالته من سيء لأسوأ لحد ما وصلت بنتي لعمر 12 سنة, وقتها مرض أبويا أوي ووقع من طوله في حالة إعياء شديدة, وأقامت بنتي معاه شهر كامل ومكنتش بتاكل ولا بتشرب غير لما كان يفوء من تعبه ويطلب منها ده..
ومات أبويا, مات واتفاجئت بجنازة مالهاش أول من آخر اتعملت عشانه, كنت بشوف ناس غريبة في جنازته بيبكوا عليه وانا ماشي مستغرب كل المحبة دي اللي كانت في قلوب الناس تجاهه, أما بنتي اللي وقعت في دور اكـ,ـتئاب ومرـ,ـضت مرـ,ـض غريب, لدرجة إنها كانت على وشك المو-ت حرفيا..
بس مع مرور الوقت اتعافت وإن فقدت كتير من بريقها وضحكها معانا وبقت دايما ساكتة مبتتكلمش, وقتها كان لازم الحق المحل وأشغله عشان مفقدش مصدر رزقي, بس كنت هشغله بإسلوبي أنا وطريقتي أنا..
بقيت أدبح الدبيحة الصبح واشتغل عادي, اللي يجي يطلب حاجة والاقي بنتي تبصلي وكأنها بتقولي ده محتاج كنت بتجاهل نظراتها واسأله عن فلوسه, وكان بيتحرج ويمشي ومكنتش بشوفه تاني, ولما بنتي اعترضت خلتها متنزلش معايا تاني عشان الصعبانيات, انا جاي أشتغل مش أخلص اللحمة على المحتاج والفقير..
وفعلا بدأ الحال يكون أحسن والدخل يزيد معايا, واشتغلت سنة واحدة وكانت الدنيا ماشية معايا زي الفُل ووقتها اقتنعت ان ابويا كان غلط في اللي بيعمله, لحد ما مراتي حملت أخيرا بعد غياب وجه يوم الولادة وحصلها نزيف وأجهضت, ودخلت في سلسلة عمليات خدت اللي ورايا واللي قدامي انتهوا بإزالة الرحم, وخسرت كل فلوسي اللي عملتها طول السنة, وعرفت ان مراتي مش هتولد تاني..
وبدأت المصايب تنزل على راسي تباعا, المحل بقا شغله ضعيف جدا جدا, وفيه محل جزارة كبير فتح بأسعار أقل مني, غير إن الناس ولسبب غير مفهوم مبقوش يحبوني, وبقوا بيتجنبوا يشتروا من عندي, بل كنت بشوف بعيني ناس تعدي من قدامي زباين للمحل, ويرجعوا بعد ساعة من ناحية محل بعيد ومعاهم لحمة, وكنت أقدر أعرف انها لحمة من شكلها في الكيس لأن دي مهنتي..
الحال وقف بطريقة مخيفة أوي, والطلب على المحل فضل يقل يقل لحد ما حرفيا بقيت بدبح كل شهر مرة بعد ما كنا أيام أبويا بندبح كل يوم تقريبا, وفضلت على الحال ده سنين, كبرت بنتي وبقت عايزة تتجهز وبالأخص لما اتخطبت, والحال بقا صعب جدا ومبقتش عارف أصرف على البيت..
ولولا مراتي اللي باعت دهبها مكناش عرفنا نجهز البنت, وقرب الفرح عليا وكنت محتاج مصاريف بأي طريقة, ومكنش فيه في جيبي جنيه تقريبا, وفوجئت بواحد معرفة جاي في السر وبيطلب مني عضمة الكتف بتاعت العِجل, كنت عارف انها بيتعمل عليها سِحر اسود, وان السحر اللي بيتعمل عليها بيكون قوي بطريقة مُخيفة جدا جدا وصعب فك السحر ده طالما ملقتش العضمة كمعالج, بس لما عرض عليا مبلغ 10 الاف جنيه عنيا زغللت, ووافقت بدون أي تفكير..
وقتها حكالي انه ياما طلب من ابويا زمان بس كان بيرفض رغم انه كان بيعرض عليه فلوس ياما, كلامه فكرني بوصايا أبويا, بس تجاهلتها عشان الدنيا تمشي, وخدت المبلغ وبعت اللوح ووعدته إني هبيعله مع كل دبيحة لوح الكتف بتاع الدبيحة, بس وانا بشفيها غصب عني السكينة خدشتها خدشة كبيرة من النص, خفت ياخد باله بس الموضوع عدى وخدها مني..
وعملنا الفرح واطمنت على بنتي مع جوزها ودخلوا مع بعض عش الزوجية, وفي نص الليل تقريبا اتصل بيا جوز بنتي, قلبي اتنفض من مكانه ورديت عشان أسمعه بيصرخ وبيستغيث بيا, جريت زي مانا على بيتهم لقيته بيفتحلي الباب وشكله غريب أوي, كان فيه دم نازل من راسه وشعره متقطع من مكانه, وسمعت صوت بنتي وعد بتضحك جوة, دخلت بسرعة على الاوضة وقلبي اتقبض من اللي شوفته..
بنتي كانت بتاكل في شعر جوزها المتقطع في ايديها بطريقة مُخيفة جدا, وكانت عمالة تضحك وترجع من بطنها مادة لونها أحمر, جريت عليها وانا مصدوم وحاولت أفهم فيها ايه, لقيت جوزها بيقول انها ض-ربته على راسه جامد, وفضلت تقطع في شعره وتاكله, وحلف انه ما هيقعد معاها يوم بعد كدا وطلقها قدامي..
خدت البنت من الشقة ولقيت ناس متجمعين تحت مستغربين, وعرفت ان فيه فضيحة كبيرة هتطلع عليا انا وبنتي ويا عالم هتنتهي امتا, هو ده الستر اللي ابويا كان بيقول عليه وبيشتريه ؟؟؟
ورجعت البيت وعرفت ان الكلام كتر في المنطقة عن بنتي, اللي يقول مجنونة, واللي يقول مكانتش عذراء, واللي يقول بتمثل على جوزها عشان مش بتحبه, كلام كان بيوصلني زي السهام اللي بتطعن في قلبي..
ونمت ليلتها مغموم, مهموم, مش طايق نفسي, وعلى نص الليل سمعت صوت غريب, كأنه صوت مقص, صحيت مخضوض لقيت بنتي بتقص شعري وعمالة تاكل فيه ووشها شاحب زي الأموات, اتنفضت من مكاني وسألتها بخوف:
– انتي بتعملي كدا ليه يا حبيبتي
لقيتها بترد بصوت رجولي خشن:
– مفيش أكل في البيت الحقير ده, ولو مجبتش أكل هاكلك انت




