
قالت بسرعة
قصدي إن حالتك فيها تدخلات طبية معقدة جدًا وفي آثار أدوية كان لازم تكوني عارفاها.
إيدي بدأت ترتعش
أنا مش فاهمة.
الدكتورة قربت الملف ناحيتي
فيه أدوية كنتِ بتاخديها أثّرت على جسمك بشكل غريب والأغرب إن جوزك ما كتبهاش في أي تقرير.
قلبي بقى يدق أسرع
طب والبيبي؟
سكتت. وده خوّفني أكتر. قلت بعصبية
اتكلمي!
قالت بهدوء
الجنين كويس لكن فيه حاجة مش طبيعية في بيانات الحمل نفسها.
شهقت
يعني إيه؟!
يعني في احتمالية إن تاريخ الحمل الحقيقي مختلف عن اللي إنتِ فاكراه.
بصّيتلها بعدم استيعاب. هي بتقول إيه؟! أنا متجوزة بقالي سنة ونص وحملت بعد الجواز بشهور. إيه اللي ممكن يكون غلط؟
الدكتورة قالت بحذر
أنا مش عايزة أخوفك بس لازم تعملي تحاليل بعد الولادة فورًا.
حسيت إني اتخبطت في صدري
تحليل ليه؟
لكنها ما ردتش مباشرة. قالت بس
احمي نفسك وما تولديش تحت إشراف جوزك.
الجملة دي رعبتني أكتر من أي حاجة. خرجت من العيادة وأنا تايهة. ركب تكسي وفضلت أبص من الشباك طول الطريق. كل ذكرى مع جوزي بدأت تتشوّه. افتكرت إنه كان رافض تمامًا أي دكتور غيره يتابعني. حتى لما تعبت في الشهر الخامس أصر ياخدني عيادته هو، رغم إن المستشفى كانت أقرب. وافتكرت حاجة تانية؛ مرة صحيت بالليل، ولقيته واقف جنبي وأنا نايمة. ولما فتحت عيني فجأة اتوتر وقال
دي مجرد فيتامينات.
وقتها صدقته. دلوقتي جسمي كله قشعر.
وصلت البيت. أول ما دخلت لقيت حماتي قاعدة في الصالة. بصّتلي بنظرة طويلة وقالت
اتأخرتي.
قلبي انقبض
كنت بتمشى شوية.
ابتسمت ابتسامة خفيفة لكن عينيها كانت باردة بشكل مخيف وقالت
لازم ترتاحي اليومين دول عشان اللي جاي مهم.
اللي جاي. نفس الطريقة الغريبة في الكلام. طلعت أوضتي بسرعة وقفلت الباب. وبدأت أفتش. أول مرة أفتش في حاجات جوزي. كنت برتعش وأنا بفتح أدراجه. ملفات، روشتات، تقارير. كل حاجة مترتبة بدقة. لكن فجأة لقيت درج مقفول بمفتاح صغير. شدّيته أكتر




